PANGANDOY PARA SA TIUNAY NGA NASUDNONG KAUSABAN

Thu, 28 Jul 2011 23:27:44 +0100

PANGANDOY PARA SA TIUNAY NGA NASUDNONG KAUSABAN

Sama sa usa ka salida kun kini magbalik-balik, dili gayud kita ganahan ug tan-aw kay susama sa usa ka sud-an nga gibalik-balik nato ug kaon, kini hastang sumoha biya kaayo.

Ang politikanhong kasinatian sa atong nasud ug sa mga katawhan niini, balik-balik lang biya gayud sulod sa dugay na kaayo nga panahon, kini mga sobra na sa kapin sa usa ka gatos na ka tuig ug gapadayon lang gihapon hangtod karon.

Unta mkahukom na kita sa pagkasumo na biya kaayo, undangon na unta kini kay nanginahanglan na kita ug kabag-uhan.

Makahinumdum ako sa gihisgutang kasaysayan sa atong mga magtutudlo sa dihang gatungha pa kita, nga ang pagka-pildi ni Bonifacio didto sa Tejeros batok kang Aguinaldo mao ang dili mahikalimtan nga tikas sa pagpili sa mga pangulo aron lang makalingkod sa pwesto sa kagahuman. Hangtod karon, mao lang gihapon ang atong nahiaguman gikan sa dakong tanghaga, kung tanghaga pa man kini karon, kun si Arroyo ba o si Fernando Poe ang nakadaug sa piniliay niadtong tuig 2004.

Kung sa Mindanao, abante na kaayo sa tinonto sa pagboto kay sa wa pa gani ang adlaw sa piniliay, humana man ug pili ang mga abatonong katawhan. Pero sa panahon biya pod sa pagpili ni Elpidio Quirino sa unang panahon, ang kalanggaman ug mga putyukan sa kalasangan namotar biya para sa iyang kadaugan. Makauulaw nga mga panghitabo para sa atong nasud.

Unsay bag-o niining tanan ug kun nganong kitang mga Pilipinhon niagwanta man sa pagtilaw niining gabalik-balik nga tikas sa atong mga demokratikanhong katungod . Giganahan pa ba kita mao nga wala pa kita sumhi? Ug tungod kay wala pa kita sumhi, haruhay ba ang tawag sa atong pamuyo karon ug nalipay ba kita nga sa tibuuk kalibutan kita ang nasud nga dunay pinaka-tulisan nga gobyerno. Nalipay ba kita niini?

Hangtod kanus-a mahuman ang atong kalipay sa pamaaging tikas sa atong sistema sa pangagamhanan?

Taman lang ba kaha kita sa mga pangandoy para sa usa ka nasudnong kausaban. Ako katulo na ako napildo sa piniliay, dili nako mabasol ang akong kaugalingon, ang mga botante ug mga nandaug nga mga kandidato. Dili pod ko moingon nga ang atong sistema daot kaayo para ako ipadaug. Sa bisan asa nga lugar sa atong nasud, gahisgut biya ang tanan sa lantarang tikas diha sa piniliay, usa ka pagtamay sa kabililhon sa atong Demokrasya.

Bisan hilasan kamo, nangandoy pa ako nga may mahitabo pang maayo sa Pilipinas. Kining akong pagsulat lang daan matag gabii nga ginahinan ko sa akong bililhong panahon, ug gani karon may binisaya na aron masabtan gayud sa tanan, usa ka pahinungod nako para sa nasud. Pagpadayag sa akong gamitoy nga kasayuran ug mga huna-huna ug nangag-ambit sa ubang mga huna-huna, labi na kanimo, kun ikaw uyon ba o sukwahi ikaw sa akong gituhuan.

Ayaw lang kaguul kay gato-o ako sa panultihon nga ‘wa man ako maka-angay sa imong mga huna-huna, apan pagakamatyan ko ang imong tawhanong katungod sa pagpadayag sa imong mga huna-huna.’

Ang susama nga kinaiyang ingon ini sa pagbinayloay ug mga huna-huna sa way tumong nga kasuko ug pagmahay, ato untang timan-an, nga maoy kinabuhi sa atong bilihong kagawasan. Kun lig-on ang atong kagawasan, ligdong usab ang mga pangulo nga mangagamhanan nato ug basin puhon pilay palad, matuman ang atong pangandoy sa usa ka nasudnong kabaghuan.

Ang Kinabuhi ni Sr. San Roque: Patron sa Kiwalan

Wed, 27 Jul 2011 15:42:27 +0100

Si San Roque natawo ngadto sa mag asawa nga may pribilihiyo sa kumonidad. Ang iyang amahan usa ka goberndor sa Montpelier, Francia. Ang iyang inahan isa ka mainampoon nga babaye nga dugay walay anak. Apan sa dihang nangayo ug intercession sa Mahal nga Birhen Maria, naka anak kani ug natawo si San Roque.

Bisan kon si San Roque ang gidihugan nga mamahimong gobernor sa dihang himatyon na ang iyang amahan, mibiya si San Roque sa kinabuhing may pribilihiyo ug nagpuyo sa yano nga kinabuhi hangtud nga miabot ang sakit sa lugar nga iyang gi-adtoan ug siya wala nag dumili sa paghatag sa iyang kaugalingon sa pagtabang sa masakiton hangtud nga siya nataptan pud sa sakit.

Sa tinguha nga dili cya makadugang sa serbisyoan nga masakiton, miadto siya sa lasang ug didto may isa ka iro nga kanunay nag atiman kaniya hangtud nga naayo pud ang iyang sakit.

Miuli siya sa ilang dapit diin ang iyang uyuan na ang nahimong gobernor, gipadakop ug gibalhog siya sa bilanggoan lima ka tuig ug wala gyud niya gipa-ila ang iyang kaugalingon aron pag likay nga siya tagaan ug pasidungog.Ulahi na nga nailhan sa iyang uyu-an nga siya diay ang iyang pag-umangkon.

Nahimong santos si San Roque tungod sa iyang paghatag dakong pasidungog sa Diyos diha sa iyang kinabuhi ug wala gigamit ang gahum sa kalibutan aron mahimong inila kondili nag serbisyo siya nga hilom ug nagpuyo sa pinaka simple nga kinabuhi nga mao ang nakapabalaan sa iyang pagkatawo.

Mabuhay, Sr. San Roque!

Hinaut imo kaming i-ampo kanunay ngadto sa Diyos ug uban sa imong intercession dunggon kami mga nagapanaw pa niining kalibutana ug unta ang imong panig-ingnan mao usab ang among mahimong giya sa pagpuyo nga puno sa gugma sa Diyos ug paghatag sa among kaugalingon nganha kanimo. Amen.

Gikan ni sa Wikipedia, gi-translate sa akong asawa, Lorelyn ngadto sai binisaya aron motuhop sa atong kasing kasing ang kamao sa atong Mahal nga Patron.

http://en.wikipedia.org/wiki/Saint_Roch

visayan-articles

PANGANDOY PARA SA TIUNAY NGA NASUDNONG KAUSABAN

Ang Kinabuhi ni Sr. San Roque: Patron sa Kiwalan